«Քմյունիթի սենթր ֆոր դիվելոփմենթ» տարածաշրջանային համագործակցության ՀԿ-ն «ՀԿ ԴեՊո» հասարակական կազմակերպությունների զարգացման ծրագրի շրջանակներում օգնում է Տավուշի մարզի ՀԿ-ներին և քաղաքացիական խմբերին՝ զարգացնելու իրենց կարողությունները, հաստատելու միջսահմանային համագործակցություն, ներգրավելու լրացուցիչ ներդրումներ միջհամայնքային խնդիրների լուծման համար: Այս ծրագրի շրջանակներում 2015թ. մայիս–օգոստոս ամիսներին կազմակերպվել է Հայաստանի Տավուշի և Վրաստանի Քվեմո-Քարտլիի մարզերի երիտասարդական խմբի անդամների հանդիպումը վրացական Բոլնիսի քաղաքում՝ համագործակցության ծրագրեր քննարկելու նպատակով:

Սոցիալական ձեռներեցության զարգացումը ՀԿ ոլորտի ներկայացուցիչների համար կենսունակ և երկարատև գործունեություն իրականացնելու իրական հնարավորություն է: 2015թ. «Քմյունիթի սենթր ֆոր դիվելոփմենթ» տարածաշրջանային համագործակցության ՀԿ-ն աջակցեց իր գործընկեր «Նոյ Աստղ» հասարակական կազմակերպությանը՝ հիմնելու տարածաշրջանում իր տեսակի մեջ եզակի վերականգնողական կենտրոն:

Կենտրոնի բացումը տեղի ունեցավ 2015թ. ապրիլի 24-ին Կողբ համայնքում: Ծրագրի շրջանակներում կենտրոնին տրամադրվեց մասնագիտական գույք և սարքավորումներ: Այստեղ ֆիզիկական թերապիայի անվճար ծառայություններ են ստանում հաշմանդամություն ունեցող 75-100 մարդ:

«Աջակցություն Նոյեմբերյանին» ՀԿ-ն վրացական «Քաղաքացիական զարգացման գործակալություն» ՀԿ-ի և «Եվրասիա» համագործակցություն հիմնադրամի հյուսիսային մասնաճյուղի հետ իրականացրել է «Միջսահմանային տնտեսական զարգացում» ծրագիրը: Ծրագիրը ֆինանսավորվել է ԵՄ «Արևելյան գործընկերության տարածաշրջանային համագործակցություն» ծրագրի շրջանակներում:

Ծրագիրը ուղղված էր բարելավելու Հայաստանի Տավուշ և Վրաստանի Քվեմո-Քարթլի մարզերի սահմանամերձ համայնքների բնակիչների կենսապայմանները՝ ամրապնդելով Տավուշ և Քվեմո-Քարթլի մարզերի սահմանամերձ բնակավայրերի միջսահմանային համագործակցությունը լրացուցիչ ներդրումներ ներգրավելու և երկու մարզերի բիզնես ոլորտի տնտեսվարող սուբյեկների միջև փոխշահավետ փոխգործակցության հնարավորությունների զարգացման միջոցով:

2014 թվականի մարտին Նոյեմբերյան քաղաքում կազմակերպվեց նկարների ցուցահանդես և վավերագրական ֆիլմերի փառատոն՝ նվիրված մարդու իրավունքների պաշտպանությանը: Փառատոնին մասնակցում էին Տավուշի և Կվեմո–Քարթլի մարզերի հասարակական կազմակերպությունների և երիտասարդական խմբերի ներկայացուցիչներ: Նպատակը երկու մարզերի քաղաքացիական ակտիվ խմբերի միջև գործընկերության հաստատումը և ամրապնդումն էր: Փառատոնին մասնակցեցին հայ և վրացի 34 երիտասարդներ՝ մարդու իրավունքների մասին իրենց նկարներով ու ֆիլմերով:

2013թ. ապրիլի 17-ին «Քմյունիթի սենթր ֆոր դիվելոփմենթ» տարածաշրջանային համագործակցության ՀԿ-ն և ԱՄՆ Խաղաղության կորպուսի կամավոր Սկիպ Բրուստերը համատեղ ֆինանսավորմամբ կազմակերպեցին ստեղծագործական նկարների մրցույթ՝ «Աշխարհի շուրջը ընթերցելով» խորագրով: Մրցույթը նպատակ ուներ բարձրացնել երեխաների հետաքրքրությունը ընթերցանության նկատմամբ: Մրցույթին մասնակցեցին Նոյեմբերյանի տարածաշրջանի 4 դպրոցների 56 աշակերտներ: Նրանք իրենց նկարներում պատկերել էին դրվագներ տարբեր գրական ստեղծագործություններից:

«Քմյունիթի սենթր ֆոր դիվելոփմենթ» տարածաշրջանային համագործակցության ՀԿ-ն իրականացնում է շարունակական ծրագրեր, որն ուղղված է Տավուշի մարզի հասարակական կազմակերպությունների և քաղաքացիական խմբերի ներկայացուցիչների մասնագիտական կարողությունների զարգացմանը, միջազգային կրթական փոխանակման ծրագրերի մասնակցության լրացուցիչ հնարավորությունների ստեղծմանը: Այս ծրագրի շրջանակներում 2012թ. հոկտեմբերին Նոյեմբերյանի ավագ դպրոցում հիմնվեց Եվրոպական կրթական ծրագրերի ռեսուրս կենտրոն: